Bruno Lopes Teixeiro (Ferrol, 1978), militante do Comité Galego de Solidariedade Internacionalista Mar de Lumes, está citado ante a xustiza o 10 de marzo para responder por un presunto delito de odio en redes sociais. A Brigada de Información da Garda Civil acusa o activista de antisemitismo: "Recollen oito chíos meus, todos de contido antisionista, ao que eles lle chaman antisemita... hai unha tendencia, polo que sei, a nivel europeo, e creo que xa se aplica no Reino Unido e creo que tamén en Francia, precisamente polas presións deste lobby sionista de equiparar o antisionismo ao antisemitismo, e non son o mesmo... Eu creo que me escollen como cabeza de turco, digamos, dun movemento que, a nivel galego, leva mantendo unhas mobilizacións [en Prol de Palestina] durante dous anos... Nin así nos van calar, porque denunciar os culpábeis e os cómplices do xenocidio e a ocupación constitúe un mínimo democrático"

 "—A Brigada de Infromación da Garda Civil acúsao dun presunto delito de odio nas redes sociais. En que se basea?
A día de hoxe non teño aínda o que seria o dossier xudicial, teño a citación e o escrito da Fiscalía, no que vén a dicir que, recibida unha denuncia oficiosa da Brigada de Información da Comandancia da Coruña, hai contido antisemita incitador ao odio e que se procede a realizar as xestións oportunas para investigalo. Entón, a partir de aí, recollen oito chíos meus, todos de contido antisionista, ao que eles lle chaman antisemita.

—Como interpreta esta equiparación que fai a Brigada de Información da Garda Civil entre antisionismo e antisemitismo?
Eu creo que, primeiro, xa hai unha irregularidade en que xa se a propia Brigada de Información a que ande a perder o tempo investigando estas cuestións. É raro, porque noutros casos que houbo ao longo do Estado sempre estivo por detrás o lobby sionista e as diferentes entidades que manexa o sionismo para presionar e facer esas denuncias. Si que hai unha tendencia, polo que sei, a nivel europeo, e creo que xa se aplica no Reino Unido e creo que tamén en Francia, precisamente polas presións deste lobby sionista de equiparar o antisionismo ao antisemitismo, e non son o mesmo.

O antisionismo é unha crítica a unha ideoloxía política, o sionismo, unha ideoloxía racial que pretende imporse pola forza e a construción dese Estado sionista en base a unha relixión, e o antisemitismo é ir en contra da relixión xudia e do propio pobo xudeu. A Garda Civil sabe que son unha persoa antifascista e tamén que, da mesma maneira que hai chíos antisionistas, hai chíos en contra do nazismo e en contra da persecución do pobo xudeu durante a Segunda Guerra Mundial, e evidentemente eu non son unha persoa que negue o holocausto. Carece totalmente de sentido todo isto.

—A que cre que responde entón esta iniciativa?
Eu creo que me escollen como cabeza de turco, digamos, dun movemento que, a nivel galego, leva mantendo unhas mobilizacións [en Prol de Palestina] durante dous anos. Moi poucas causas neste país tiveron unha solidariedade activa de tan longo percorrido, de facto, o próximo luns volveremos saír ás rúas para seguir denunciando este xenocidio. Eu creo que é unha maneira de acalar esa solidariedade.

O lóxico sería que non tivese percorrido xudicial

Persoalmente son un dos portavoces da Coordinadora Galega en Solidariedade con Palestina na comarca de Trasancos, unhas das persoas que leva lendo o manifesto da coordinadora durante estes dous anos e creo que non foi por acaso que me escolleran a min.

—Mar de Lumes, entidade da que fai parte, fala de "montaxe" e "persecución policial".
Si, porque non ten nin pés nin cabeza. Un dos chíos que escollen pon: "Alemaña segue instalada no nazismo(sionismo). Non aprenderon nada da historia", que fai referencia a outro chío que dicía que Alemaña ía perseguir as mobilizacións pro-Palestina. Pois iso, para a Garda Civil, é antisemitismo. Non digo tampouco nada que non digan militantes xudeus antisionistas, contrarios ao Estado de Israel. Outro chío: "Do río ao mar só ten un significado e é a desaparición do Estado sionista de Israel". Iso tamén o din destacados militantes antisionistas ao longo do mundo, moitos deles xudeus.

—Cando terá que declarar?
A cita nos xulgados, que xa son moitas casualidades, é o 10 de marzo, Día da Clase Obreira Galega, aquí en Ferrol ás 12 do mediodía, polo que coincidirá cos actos organizados pola CIG. O caso está en mans do servizo xurídico que o vai levar. Agora a cuestión é esperar. O lóxico sería que non tivese percorrido xudicial, mais vendo a situación da xustiza española e a situación global, podes esperar calquera cousa. Pero eu estou bastante tranquilo.

Unha forma de "estender o medo"

Mar de Lumes denunciou antonte en redes sociais "a acusación construída de oficio" pola Garda Civil, contra Lopes Teixeiro. Segundo di nun comunicado, o corpo policial confunde de forma "deliberada" antisionismo e antisemitismo co fin de "restrinxir a liberdade de expresión e estender o medo".

"Bruno Lopes e os millares e millares de persoas que reiteradamente nos mobilizamos na Galiza en apoio ao pobo palestino, somos antisionistas declaradas e repudiamos a existencia mesma do Estado sionista de Israel", afirma a entidade. "Nin así nos van calar, porque denunciar os culpábeis e os cómplices do xenocidio e a ocupación constitúe un mínimo democrático".

A esta mostra de apoio, Lopes Teixeiro sumou nas últimas horas o de numerosas persoas e organizacións do ámbito político, sindical e cultural." 

(Susana Rois, Nós, 08/01/26)