"A cabeza de lista da candidatura pola Coruña de Más País, Carolina
Bescansa, afirmou este venres que o partido de Íñigo Errejón irrumpe no
panorama político por unha "decisión de responsabilidade": "se nós non deramos este paso, unha parte importante do voto progresista absteríase",
comenta Bescansa. Deste xeito, preséntanse como unha "proposta contra
esa abstencións" e "para garantir un goberno de progreso".
Bescansa participou na mañá deste venres nunha entrevista realizada por
alumnado de Xornalismo e celebrada na Facultade de Ciencias da
Comunicación de Santiago de Compostela. A candidata aproveitou esta
ocasión para defender a universidade pública e
recoñecer "os esforzos que fai o profesorado" a prol desta defensa.
Cualificou o labor destes profesionais como un "exercicio de
xenerosidade" por explicar na práctica como é que funciona o Xornalismo e
a Televisión.
Explicou, ademais, que as liñas estratéxicas do partido en Galicia versarán sobre catro eixos: o gran acordo verde e ecolóxico para
a transición enerxética, a loita contra o machismo, a fronte contra a
emerxencia medioambiental e a transformación do mercado de traballo
vinculado á transición enerxética e a derrrogación da
reforma laboral. O obxectivo, segundo di, é "poñer fin á gran marea de
rapaces e rapazas que seguen saíndo do país".
"Agradecida" pola acollida, Bescansa afirmou perante os medios neste
primeiro acto de toma de contacto que comezarán a campaña presentando o "gran acordo verde", eixe programático de Más País, que aposta por unha "visión integral" cara a transición enerxética e do modelo produtivo.
Respecto da proposta de Rivera a Sánchez e a Casado de pactar certas
reformas de Estado por escrito antes das Eleccións, Carolina Bescansa
pregúntase "por que son posibles agora cousas que non foron posibles no pasado".
Considera, ademais, que ata que non aclaren como se constrúe un
goberno, falar de políticas concretas é "unha tomadura de pelo". (Galicia Confidencial, 11/10/19)
No hay comentarios:
Publicar un comentario